Winterfreud em Schnei
von Gaby Amm
*1929
Wat eß dat för ne Puutespaß!
Der Trümmerberg es deef verschneit.
Et freut sich ald de ganze Klass,
de Zick nit flöck genog vergeiht.
Holt ühre Schlitte doch erus!
Om Kopp do wärmp en wölle Mötz,
weil jede Panz dobei sin muß,
wann zogefroren eß der Pötz.
De Händsche an, ne decke Schal!
En Schneiballschlaach, die eß am Gang:
"Mir sin hück en der Üvverzahl!"
De Gägemannschaff eß nit bang.
Die Tappe all, die weiß Praach.
Wie schön eß doch dat Winterbild.
Et mäht, dat mänchen Ahl noch laach
un denk, wie hä als Kind gespillt.
Manuskript 1985
Quelle: koelsch-akademie.de