Der Winter
von Laurenz Kiesgen
1869-1957
Hät der Winter et Regalt,
git et nix ze laache!
Hinger fään, des Naaks em Wald,
lieht vör Froß hä't kraache.
Mäht sich morgens op de Söck.
Eingemummelt, wieß sing Röck,
talp hä isig üvver Land:
"Ich kann allerhand!"
Nor ne Treck us singer Pief -
un de Nevvelwolke
ston om wigge Feld, wie stief
Kohmilch, fresch gemolke!'
'n besge fummelt hä, un süch:
Wieß dat mollig weiche Züch
risselt, fisselt wick ov breit,
Stäuv wie nit gescheit.
Winter steiht dann vör der Stadt
stell un röf met Staune:
"Zapperlötches! Wat eß dat?
Kölle, häs de Laune?
Wells de nit pareere meer?
Waht nor, ich kaveeren deer,
dismol spörsch do och ming Füüs!
Sparen dun ich - nüüs!"
aus: Laurenz Kiesgen: Vum ale Kölle,
Heimatverein (Hrsg.), Köln: 1970, S. 51
Quelle: koelsch-akademie.de