Naaks am Rhing
von Goswin Peter Gath
1898-1959
Der Mond schwemmp durch de Wolke.
Et rähnt ganz stell un fing.
Am Ofer stonn ich lang ald
un looren op der Rhing.
Dä driev do schwer vorüvver
En singer Kraff un Maach,
Su wie et Schecksal selver
En minges Levvens Naach.
Wat brängk hä us der Fähnde?
Wat nimmp hä vu'mer met?
Wahl alles, wat ich jemols
Gedraump, gewünsch un lett?
Mie Hätz eß stell, verschwieg sich.
Der Rähn köhlt mie Geseech.
Su schwer es et zomot mer
un widder och su leech...
Et ruusch un pruusch un pladdert
Et singk och jett dobei.
Dat es ming Siel, die trüs sich.
Der Rhing driev schwatz vörbei.
aus: Goswin Peter Gath: Draum un Spill,
Köln: Balduin Pick Verlag,1947, S. 53
aus: Goswin Peter Gath: Us dem Hätzenskühlche,
aus dem Nachlass herausgegeben,
Köln: Greven Verlag, 1973, S. 111
Quelle: www.koelsch-akademie.de