Dezemberovend!
von Heinz Magka
1904-1960
Lunk ens durch de Rutte, Kind,
süch, die dausend Stääne
wehden en der Chreßdagsnaach
wahl mie Kindche sähne.
Süch, wie rut d'r Himmel glöht,
Chreßkindche deit backe.
Un der hellige Zinter Klos
eß d'r Sack am packe.
Kindche! - Do! - Häß do gesinn?
Wä do kom zo fleege?
Dich em sillige Chreßnaaksdraum
en d'r Schlof zo weege?
Süch, et Chreßkind geit ald öm,
hör die helle Klöckcher! - -
Wie? - Do häß et nit gesinn?
Met dä golde Löckcher?
Schlöfs do, Kindche? - Dat eß räch.
Wä mööch dich wahl störe?
Denn em Draum wees do doch jitz
hell die Klöckcher höre.
aus: Heinz Magka: Durch et Levve kratz un quer,
Gummersbach: Oberbergischer Bote,1938, S.53
Quelle: koelsch-akademie.de