Dezember
von Jupp Blank
1904 - 1979
Jrau es d'r Daach
un et Leech su dröf,
huh us d'r Looch
en Kroh heiser röf.
Naaks es et kalt,
un vum Himmel fällt
heimlich d'r Schnei
janz höösch op de Welt.
Un wann et freet,
dat de Ääd bal kraach,
brus rauh d'r Wind
ieskalt durch de Naach.
Mänchmol süht mer
'ne Stän jolden stonn,
un stell me'm Mond
huh am Himmel jonn.
Su stund hä och
domols bei däm Stall,
et strohlt de Welt
voll Jlanz üverall.
Su bliev et, bes
de Ääd verjeit,
un iwich dä Stän
hell am Himmel steit!
aus: Jupp Blank: Kölsch ka'mer nit nur drinke,
Köln: Heimatverein Köln-Dellbrück, 0.J., S. 106
Quelle: koelsch-akademie.de