Neujohrswünsch
von Alice Herrwegen
*1956
Jeder sök sich en dä Däg
öm Sylvester ene Wäg,
brängk si Levve en de Reih,
mööch dat Alldagseinerlei
neu bewäge un bei sich
och jet ändere secherlich.
Ich han mer nit üvverlaht,
wat et aale Johr gebraht.
"Wat vörbei, dat kann ich messe",
liet e Fastelovendsleed mich wesse.
Ävvver morge,
dat sin su ming Sorge,
well ich mänches anders maache,
üvver all die Jecke laache,
die sich vill zo äänz off nemme,
die die schlemme
Aangewende han,
su als richtige Business-Mann
eine op ärg wichtig ze makeere.
Su en Häre - deit mer Leid-
maache bloß sich selver Freud.
Ävver et gitt do och Fraulück,
denne sujet vill bedügg.
Ihrlich, su en Pappfigure
wääd ich bloß noch scheif aanluure.
Jo un morge,
dat sin su ming Sorge,
well ich mänches anders maache,
üvver all die Jecke laache,
die nem Hühtere en de Fott gään kruffe,
die op Schluffe
höösch bloß kusche,
wesst ehr, su en richtige Lusche,
die kann ich partout nit ligge,
die han Sigge - die sin fies,
richtig widderlich un mies.
Ihrlich, su en Pappfigure,
wääd ich bloß noch scheif aanluure.
Jo un morge,
dat sin su ming Sorge,
well ich mänches anders maache,
üvver mich well ich laut laache,
sollt ich bei mir jet entdecke,
wat dä Jecke ähnlich söch,
ging ich andere Minsche höösch
met Geseiver un Geschwad
öm de Muul un öm der Baat
oder dät ming Nas huh drage,
dät mich wage,
andere nit zozetraue,
wat ich selvs han en de Maue,
wööd ich su, ich dät mich schamme!
Ävver - Godd sei Dank - ich stamme
jo us Kölle, un mer Kölsche - wie mer säht -
blieve met de Föß gään op der Ääd.
Jo un morge,
dat sin su ming Sorge,
kaÕmer dann do gar nix maache?
Dat es doch nit för ze Laache,
wann se alles demoleere,
Stroßebahne, Wäng beschmeere
oder andere zerschlage,
op de Auge en der Mage!
Nä, de Jugend es doch schlääch!
Han ich Rääch?
Oder sollt mer ens woanders
söke: Internet un - wat en Schand es -
Sex and Crime op alle Sender,
Horrortrips, och Kinderschänder
finge alles, wat se welle,
breche Kindersiele, stelle
Puute wääde zo Krawallköpp,
su en Ströpp
wääde einfach üvverrollt,
hatt ehr wirklich dat gewollt?
Dat sin nit allein ming Sorge - morge!
aus: Manuskript 2001
Quelle: koelsch-akademie.de